Өвүрнүң школазында сайгарлыкчы чорук
Солчур ортумак школазынга Тываның Баштайгыларының аныяк сайгарлыкчылар ярмарказы болуп эрткен. Садыг-делгегеге дузаан ногаа аймаа, варенье, компоттар, капуста, помидор дээш чүү чок дээрил… Кышкы үүже - күш-ажылчы өг-бүлелерниң чоргааралы.
Элбекшилдиг күскү дүжүт – часкы үеде уругларга-даа, улугларга-даа өөрүшкү. Ярмарканың киржикчилери изиг күзелдии-биле янзы-бүрү чаагай чемнерни садып ап турган, ногаа дузаарының аргаларын сайгарып, бажыңга консервирование кылырының чажыттарын үлешкеннер.
Оон аңгыда национал чемнер: өреме, творог, саржаг, быштак база курутту онзагай сонуургаан. Сайгарлыкчы ажыл-херекте боттарының күжүн шенээн школачылар рекламаның күжүнге бүзүреп, садып алыкчыларны хаара тудар дээш, бараанын идепкейлиг мактааннар.
Өвүр кожуунда Баштайгыларның аныяк сайгарлыкчылар клуву 3 аңгы школада ажыттынганын сагындыраал.
Мира Конгул-оол белеткээн.
Чурукту социал четкилерден алган.
