Баштайгыларның кады төрээн акылары база дуңмалары хөй

Кызылдың 5 дугаар гимназиязының Баштайгылары Акы база дуңма хүнүнге тураскаааткан "Найыралдан артык" бүгү Россия чергелиг акцияга киришкеннер. Чыл санында дыка хөй чурттар апрель 10-нуң хүнүнде Акының болгаш дуңманың хүнүн демдеглеп турар. Байырлал буянныг чорукту, чоок кижилеринге ынакшылды, кичээнгейни илередип турар. Бо хүннүң эң-не кол маадырлары - кады төрээн дуңмалары, акылары. Россияда ук байырлал чыл санында нептереп кел чыдар. Чамдык өг-бүлелерде чаагай чаңчылдар тыптып, онзагай талаларлыг апаргылаан. Өг-бүле бүрүзүнде ол аңгы-аңгы: чамдыктар чүгле боттары, а чамдыктар чоок улустарын чалап алгаш, белек-селек солчурлар. Ниитизи-биле байырлалды хөглүг эрттирип, чоок кижилеринче сагышты салып турары өөрүнчүг. Алена Нан-Хоо, чуруктарны социал четкилерден алган.