Бирги классчыларга «Үжүглелим, байырлыг!» деп байырлалды студентилер эрттирген

Совет Эвилелиниӊ Маадыры М. А. Бухтуев аттыг Кызылдыӊ № 1 школазынга «Үжүглелим, байырлыг!» деп байырлал болуп эрткен. 1 «б» класска байырлыг хемчегни Тываныӊ күрүне университединиӊ Тыва Республиканыӊ Улустуӊ чогаалчызы А.А. Даржай аттыг Кызылдыӊ педагогика институдунуӊ НООвд_305 деп бөлүктүӊ бирги курузунуӊ студентилери аалдап четкеннер. Байырлалдыӊ башкарыкчылары болгаш аалчылары Ника Монгуш, Ховалыг Аганак, Сырга Момбуй болгаш тыва дыл башкызы, бөлүктүӊ куратору Шенне Азыраа болганнар. Олар өөреникчилер-биле деӊге үжүглел ному-биле байырлажып, 2-ги класстан тура өөренир «Тыва дыл» болгаш «Литературлуг номчулга» деп эртемнерни таныштырып, солун оюннарны эрттиргеннер. Өөреникчилер «Үжүглел» деп эртемге номчуп, бижип алганын бадыткап, Шоома Даржайныӊ «Үжүглелим үжүктери» деп шүлүүнде 36 үжүктерниӊ дугайында чугаалааннар. Ада-иелер уругларын деткип, чараш байырлалга келгеннер. Хемчегниӊ төнчүзүнде класстыӊ башкызы Айлан Ооржак өөреникчилеринге эки чайгы дыштанылганы, ада-иезиниӊ сөзүн дыӊнап, айыыл чок чоруктуӊ дүрүмнерин хажыт чокка сагыырын чагаан. ТывКУ-нуң медээзи болгаш чуруу.