Бодумнуң галереямны ажыдар күзелдиг мен

«Сылдысчыгаш» солуннуң бо үндүрүлгезинде бичии Мира Дондукту таныштырар-дыр бис, уруглар. Мираның авазы Милана Дондук — Кызыл хоорайда «BABY МАССАЖ» уруглар төвүнүң удуртукчузу, ачазы Мерген Дондук – программист. Мира — Кызылдың 1 дугаар школазының ийиги классчызы. Ол чуруурунга ынак, «Весёлый карандаш» немелде өөредилге төвүнче барып турар. Респуб­лика чергелиг чурук мөөрейиниң тиилекчизи. «Сылдысчыгаштың» корреспондентизи Мира Дондук-биле чугаалашкан. - Хостуг үеңде чүнү кылырынга ынак сен, Мира? - Чаштынчып ойнаа­рынга, мультик көөрүнге ынак мен. Оон ыңай «Белоснежка и семь гно­мов» ном­ну номчуурунга, Корней Чу­ковскийниң шүлүктерин ном­чуур мен. - Келир үеде кандыг күзелдиг сен? Кымга дөмей болуксаар-дыр сен? - Мээң эң-не улуг күзелим – галерея ажыдып алыры. Чурукчу болуксаар мен. Авам чедиишкинниг хууда сайгарлыкчы болганда, бодумнуң чуруктарымдан акшаны ажылдап алыр бодалым бар. Бодум садыг ажыдып алыр азы авамнның төвүнге чуруктарымны садар күзелим улуг. Клава Кокага дөмей болуксаар мен. - Эштериң дуга­йында чугаалап кө­рем, кымның-биле ой­наар-дыр сен? - Эштерим чогум хөй, ын­чалза-даа Амалия би­ле Шең­не меңээ эң-не чоок. Олар-биле кады төрээннер уруг­­лары бис. Амгы үеде Амалия арай-ла ада-иези-биле Чу­коткаже чурттап чо­руй барганнар. Дыка сактып тур мен, хүннүң-не телефонга чугаалажыр бис. Клазымда эштеримден Дандар-биле найыралдыг мен. Чаңгыс партага олуруп эгелээш, найырал­дыг апардывыс. Чапсар үезинде ойнаар. Ам бисти өске парталарда олуртуп каан, ынчангаш кичээлдер үезинде чугаалажып тур бис. Улуг акым бар болгаш, эштеримниң хөй кезии оолдар чадавас. - Кады төрээннериңни таныштырып көрем. - Улуг акым Алик 14 харлыг, ол лицейде өөренип турар. Бодумдан бичии кыс дуңмам бар, 3 харлыг, садик барып турар. - Чайгы дыштанылгаң канчаар эртти? - Бо чайын Таңдының Дүрген суурда кырган-авам, кыр­ган кырган-авамның чанынга бардым. «Солнечная Тесь» санаторийге, Уургайлыг аржаанга, Дус-Хөл, Чагытай, Хадың хөлдерге дыштанып турдувус. Оон ыңай Абакан, Красноярскыга чет­тивис. Меңээ санаторийге дыштанганывыс уттундурбас болуп арткан. Мира КОНГУЛ-ООЛ очулдурган Милана Дондуктуң чуруу