Чаштар — чуртталганың өөрүшкүзү

Өг-бүлеге бичии чаштың төрүттүнүп келири — кезээде улуг өөрүшкү. Ооң-биле кады чуртталга шупту өскерлир. "Чаштар — амыдыралдың чүгле өңгүр-каас чечектери эвес", а харын-даа "аас-кежии" деп сөс немексенчиг. "Сылдысчыгаштың" март айда үндүрүлгезинде база бир кайгамчыктыг "чечектерниң" бирээзи бичии Дамырак-биле силерни таныштырар-дыр бис, уруглар. Ол база-ла бодунуң өг-бүлезинде ада-иезин, кырган ава-ачаларын, төрелдерин өөртүп, аас-кежиктиг өзүп орар. Дамырак амгы үеде шериг хоорайжыгажының "Сказка" уруглар садынче барып турар. Ол 5 харлыг, а чайын 6 харлаптар. Ол — Вадим, Чаяна Монгуштарның хеймер кызы. Дамырактың улуг акызын Доржу дээр, а угбазы — Дарина. Уругларның ачазы амгы үеде тускай шериг операциязында киржип турар. Бичии Дамырак чуруттунарынга ынак, ынчангаш ол байырлал санында өг-бүлезиниң кежигүннеринге чараш открыткаларны чуруп бээр. "Мен авам-ачамның бичии даңгыназы мен. Акым, угбам база бар. Мээң акым ачам ышкаш күштүг болгаш чараш, чүге дизе ол дыка чараш шериг хептер кедер. А угбам Дарина авам ышкаш чараш. Чуруттунарынга ынак болгаш, авамга, ачамга база акым, угбамга хөглүг открыткаларны үргүлчү бодум чуруп берип турар мен. Оларның арын-шырайынга өөрүшкү-маңнай, хүлүмзүрүг чайнап-ла турар болза, меңээ эки. Оон ыңай "Морозко" деп тоолду көөрүнге ынак мен. Ону каш-даа катап көөр. Маша биле Адыг дугайында мультикти көөрүнге база ынак мен. Маша дыка бичии хирезинде чүнү-даа билир хөглүгбей болгай. Садигимде ынак башкыларым бар. Ол дээрге Азияна Эдуардовна биле Чойгана Романовна-дыр. Олар мээң чажымны чараш кылдыр өрүп бээрлер. Меңээ дыка тааржыр. Ол ышкаш ада-ием-биле аян-чорук чоруурунга ынак мен. Эрткен чылын шупту Байкал чораан бис. Мээң төрүттүнген хүнүм Улан-Удэ хоорайга эрткен" - деп, бичии Дамырак чугаалаан. Беш харлыг Дамырак амдан эгелеп, санап-бижип билир. Бодалгаларны безин бодаптар. Ол улуг сонуургал-биле Улан-Удэ хоорайны "Сылдысчыгаштың" коррес­пондентизинге чугаалап берген. Ынчанмайн канчаар, ооң 5 харлаан төрүттүнген хүнү аңаа эрткени уттундурбас болбас арга чок. Дамырактың келир үеде күзели — Спасск суургазын көөрү, эң ылаңгыя Чаа чылдың дүнезинде Кремльдиң курантызы соп турары аңаа сонуурганчыг. Мира КОНГУЛ-ООЛ очулдурган