Даяна Дамбыра — 3 «д» класстың бичии сылдызы
Бөгүн Кызыл хоорайның 3 дугаар школазының 3 «д» клазының өөреникчизи Даяна Дамбыра-биле таныштыраал. Ол 9 харлыг, ынчалза-даа дыка хөй чурттарга чедип каапкан, национал хөгжүм херекселинге ойнап билир, ийи даштыкы дылдарны өөренип алган.
«Сылдысчыгаш» солуннуң корреспондентизи Даяна-биле ужурашкаш, ооң чедиишкиннериниң чажыдын сонуургаан.
— Даяна, эң-не ынак эртемиң чүл?
— Орус, англи дылдар кичээли база күш-культурага ынак мен. Ынчалза-даа дылдарга сонуургалым улуг. Ол ада-иемден келген деп бодаар мен. Бичии тургаш-ла, филология факультединиң студентилери болгаш башкыларының аразынга өскен мен. Авамның ажылы-биле. Башкылар мени «полк уруу» деп баштактанып турганнар.
— Чүгле орус эвес, а өске-даа дылдарны өөренип турар деп дыңнадым. Шын бе?
— Ийе, англи база кыдат дылдарны өөренип турар мен. Чамдыкта берге сөстерни сактып алыры нарын-даа болза, дыка солун.
— Школадан чедип келгеш, чүнү кылыр-дыр сен?
— Интернет четкизинде бодумнуң арынымга видео тырттырарынга ынак мен, ырлаар, танцылаар. Оон ыңай авамга дузалажыр: аяк, шала чуур, чечектер суггарар, чамдыкта бодумнуң хептерим-даа базып алыр мен.
— Тергиин эки-дир, чүгле бажың ажылынга дузалаар-дыр сен бе азы өскелерге база бе?
— Чурттаар чер чок дириг амытаннар азы улуг назылыгларга дуза херек апарза, чанындан анаа эртип шыдавас мен. Оларга ыяап-ла дузалажыр. Кижи бүрүзүнүң чүрээ чымчак, эриг баарлыг болур ужурлуг деп бодаар мен.
— Өг-бүлеңни таныштырып көрем. Кым сеңээ эң-не үлегер-чижектиг-дир?
— Мээң өг-бүлем кайгамчык солун улус. Кырган-ачам Одушпаяк Даш-оол Викторович — күш-ажылгыр болгаш шыдамыккай чоруктуң үлегери. Акым Эртине мени харыысалгалыг, күш-ажылгыр, кежээ болурунга өөреткен. Авам – чараш болурунуң база ынакшылдың үлегери. Хүн бүрүзүнде олардан чаа чүүлдү өөренип ап турар мен.
— Өзүп келгеш кым болур сен?
— Баштай садыгжы болур күзелдиг турдум, бодаарымга, боду садыглыг болурга, дыка эки ышкаш болган. Ам-даа бодум садыг ажыдар күзелим хевээр. Ынчалза-даа эмчи болур күзелим база бар.
— Дыка хөй черлерже аян-чорук кылган-дыр силер? Каяа-каяа четкен силер?
— Авам-биле бүдүн Россияны кезээн бис: Москва, Сочи, Алушта, Иркутск, Красноярск дээш оон-даа өске хоорайлар. Оон аңгыда Киргизия, Казахстан, Моол, харын-даа Кыдат четкен бис. Ам база катап далай эриинге дыштаныр күзелдиг мен.
— Даяна, «Сылдысчыгаш» солуннуң бичии номчукчуларынга солун чугааң дээш четтирдивис.
— Силерге база четтирдим. Мээң социал четкилерде арынымче кирип алырын сүмеледим. Чаа эштерге кезээде өөрүүр мен!
Мира КОНГУЛ-ООЛ.
Өг-бүлениң чуруктары
