ИДИК-ХЕП КЕТПЕС УРУГЛАРГА КӨГҮДҮГЛЕР
Бурунгу өгбелеривис бичии уругларга көгүдүглерни дыка хөй ажыглап турган. Ыглаган, пөрүк, чем чивес азы могаттыныычал уругларны көгүдүглерниң күжү-биле омак-хөглүг, эрес-кежээ, шимченгир кылдыр өстүрүп кижизидер арга деп санап чораан.
Көгүдүглер - бичии кижиниң угаан-медерелин сайзырадып, бодунга бүзүрелин күштелдирип, эки чүүлдерже чүткүүрүнге идигни бээр ужурлуг.
ИДИК-ХЕП КЕТПЕС УРУГЛАРГА КӨГҮДҮГЛЕР
Теп-теп, кежээкей,
Теве сарыг идииң кет,
Топ-топ, кежээкей,
Тонуң кет, чарашпай.
Хептерин боду кедер
Кежээпейни көрүңер даан,
Тонун кеткеш базыпты,
Тоолзуг маадыр көрүңер даан.
ЧАА КЫЛАШТАП ӨӨРЕНИП ТУРАР УРУГЛАРГА
Бирээ, ийи, бөөп-бөөп,
Бир бастым, бөөп-бөөп.
Бөөп-бөөп, бөпүйлең,
Бөпүй-бөпүй бурунгаар,
Бирээ, ийи, үш…
ЧЕМ ЧИВЕС УРУГЛАРГА
Как-каак, кежээ кижи,
Кадыын чип аар, кежээ кижи,
Чөкпектиг чемин чиир,
Чөптүгбейим, эреспейим!
УДУВАС УРУГЛАРГА
Бирээ, ийи, карааң шим!
Үш, дөрт, оожум тын!
Дөрт, беш, алды,
Дүрген уду, эргимим.
Информацияны болгаш чурукту ажык социал четкилерден алган
