Күскү дүжүттүң болгаш чогаадыкчы чоруктуң байырлалы

Республиканың школаларында «Алдын күс» байырлалын эрттирип турар. Чыл санында школаларга күскү дүжүттүң, чогаадыкчы чоруктуң байырлалын эрттирери чаңчылчаан. Дүүн Кызыл хоорайның 9 дугаар гимназиязының үстүкү классчыларының ортузунга «Күстүң Мисс болгаш Мистери» мөөрей болуп эрткен. Тостан он бир класстың өөреникчилери ук мөөрейге боттарының чогаадыкчы чоруун, салым-чаяанын бараалгадып, янзы-бүрү мөөрейлерге адааннашканнар. Оолдар, уруглар «Күстүң даңгыназының боодал чечээ», «Боктуң ийиги тыныжы» дээш оон-даа өске солун чадаларны эрткен. Мөөрейниң киржикчилери интеллектуалдыг оюнга киржип, солун айтырыгларга харыылааннар. Оон аңгыда бүрүлер аразындан сөстерни ушта тырткаш, таварышкан сөстери-биле шүлүк чогаадыр оюнга оолдар, уруглар идепкейлиг киришкеннер. «Алдын күстүң» байырлалы ногаа-чимистиң делгелгези чокта, кайыын эртер. Школачылар чайладыр огородтарынга суггарып, ажаап алган дүжүдүнден кылган овур-хевирлерни делгээн. Мира Конгул-оол.