Кырган-авам бистиң чанывыста чок-даа болза, бисти көрүп, камгалап чоруур

Мен Иелер хүнүн уткуштур мээң ынак авамны чырык чер кырынга чаяап каан эргим кырган-авамның дугайын сактып бижикседим. Кырган-авамны Успун Арья Хомушкуевна дээр. Ол Мөңгүн-Тайга кожуунга ажылдап чурттап чораан. Эрткен чазын аарааш, чок апарган. Кырган-авам – ИХЯ-ның хоочуну, майор эргелиг чораан. Хөй ажы-төлдү азырап өстүрген дээш «Маадыр-ие» деп медаль-биле шаңнаткан. Мен кырган-авамны "авия"деп чассып адаар мен. Авиям дег ажылгыр-кежээ, олут олурбас кижи кайда-даа чок. Шупту ажылды кылып билир кижи. Бажыңнарга суугу кылыр тууйбуну боду дойдан өрттедип алыр. Чылыг чоорган, кудусту, өпеяаларга бопуктар даараар, хеп аргыыр база. «Аяк-шай» ресторанны башкарып чораан. Бистиң төрүттүнген хүннеривисте бодунуң быжырып каан булочка болгаш тортун чорудар. Кандыг өөренип турарывысты айтырар, чылыг хевивисти база четчележир. Мен ындыг кырган-авалыг болганым дээш чоргаарланыр мен. Кырган-авамның адын сыкпайн, өзүп келгеш, кылып чораан ажылдарын уламчылаар мен. Эң-не эргим кырган-авамның чазык чаңы, эргим үнү чоктанчыг-даа болза, бистиң чанывыста чок-даа болза, мээң сеткилимде кырган-авам бар, бисти көрүп, камгалап чоруур! Чоргаар СААЯ. Кызылдың 9 дугаар гимназиязында 5 "б" класстың өөреникчизи. "Элээди журналист" бөлгүмнүң кежигүнү