Кырган-авамга байыр чедирип тур мен

Мээң бо чайын хоорайга база суурга чайгы дыштанылгам эрткен. Кызыл-Мажалык суурда кырган-авам Наталья Александровна Чооду 65 харлыг. Кырган-авамның буду аарып турар болгаш, чамдыкта ажылга күш четпес кижи. Ынчангаш аяк чуп, ногаа аймаан суггарып, садыгдан чем садып эккеп турган мен. Кырган-авам мени шыдыраага ойнап өөредип каан. Оон ыңай бисти бодунуң бичиизинде ойнап чораан оюннарынга өөредип турду: скакалка, тевек, хол бөмбүү, оон узун-тыныш. Кежээки үелерде солун чугаалар биле тоолдар, каттырынчыг ужуралдар чугаалап бээр. Мээң хоорайже чанар үем кээрге, кырган-авам муңгарап турду. Мен кырган-авамны кээргеп турдум. Күскү дыштанылгалар кээрге, ынак кырган-авамга ам база дузалажыр мен. Кырган-авамга Улуг назылыглар хүнү-биле байыр чедирип тур мен❤ Чоргаар СААЯ. Кызылдың 9 дугаар гимназиязында 5 "б" класстың өөреникчизи. "Элээди журналист" бөлгүмнүң кежигүнү