Мөренде “Хүнчүгеш” уруглар садының элбек дүжүдү

Эрзин кожууннуң Мөрен сумузунда “Хүнчүгеш” уруглар садынче кээп турар чаштарны бедик арга-дуржулгалыг, ажы-төлге ынак башкылар, кижизидикчилер бүгү эртем-билиин өргүвүшаан, ажаап, карактап, өөредип турар. Уруглар садының эрес-кежээ коллективи бодунуң күжү-биле чылыткыны кылып, аңгы-аңгы ногаа аймаан тарып ап турар. Бо күзүн часкы ажылдарның түңнелдери илереп, ногаа аймааның дүжүдү ниитизи-биле элбек үнген. Уругларга кыштадыр чемге ажыглаар ногаа, чимис аймаандан хоолулуг аъш-чемнерни чаагай шынарын камнап, болбаазырадып белеткеп шыгжааннар. Тал деп черге тараан картофельдиң дүжүдү база эки болган. Уруглар садын даштындан көөрге-ле магаданчыг: оран-савазы эптиг, бүгү девискээрни өң-баазын чараш чечектер, чадаң үнүштер каастаан, уруг-дарыгның өөрүшкүлүг каткы-чугаазы чаңгыланган. Бо өөредилге чылында уруглар сады ук көргүзүглери-биле, чаагайжыдылгазы болгаш ногаанчыдылгазы эң эки болганы дээш, Эрзин кожуун чагыргазының өөредилге эргелелиниң Хүндүлел бижиинге төлептиг болган. Коллектив эп-найыралдыг, демниг башкылар болгаш ажылчыннардан тургустунган. Кандыг-даа ажыл дээнде эрес-кашпагай, идепкейлиглер – кижизидикчи башкы А.Б. Анзай, ажыл-агый эргелекчизи У.Я. Ныңмыр, одакчы А.А. Самыя база таңныыл Н.В. Намдак оларны адап болур.