Орук шимчээшкининиң бичии инспекторлары

Кызыл хоорайның 9 дугаар гимназиязында «Айыыл чок оруктар» акциязы эртип турар. Ону уругларның орук дүрүмнериниң талазы-биле билиглерин быжыглаар болгаш орук-транспорт болуушкуннарынга удур профилактика кылдыр чыл санында чорудуп турар. Бөгүн школаның девискээрин долгандыр чадаг кижи кылаштаар оруктарга 6 «г» класстың өөреникчилери патрульга киришкен. Олар чолаачыларга сагындырыг буклеттерни үлеп, чадаг кижи кежер оруктарга хайгыылчылаан. Сарул Оюн, 6 «г» класстың өөреникчизи: - Биске башкыларывыс үргүлчү орук шимчээшкининиң дүрүмнерин өөредип турар. Сентябрь 1-де өөренип чедип келиривиске, шуптувустуң чурттап турар черлеривисти бижээш, орук картазын кылган бис. Школа чанында светофорлар чүгле ногаан өңнүг турда, орукту кежир кылаштаар. Оон ыңай орукта зебра чуруп каан черлерден эртер дээш оон-даа өске. Орукту кежерде, ыяап-ла кыдыгларын хынап алыр. Бичии класстарның өөреникчилеринге дузалажыр дээш, бис база орук патрульдап тур бис. «Орук шимчээшкининиң айыыл чок чоруунуң неделязы» езугаар школада янзы-бүрү хемчеглерни организастаан. Школаның иштинде «Орук кежериниң дүрүмнериниң дугайында өөреникчилерге сагындырыг», «Орук шимчээшкининиң дүрүмүнүң талазы-биле ада-иелерге сагындырыг» деп темаларлыг айыыл чок чоруктуң булуңун кылган. Оон аңгыда «Орук шимчээшкининиң айыыл чок чоруунуң чаңгыс аай хүнүнче» класс шактары, беседалар кирген болгаш, видеоматериалдарны көөр. «Кичээлдер мурнунда «Айыыл чок чоруктуң минутазын» эрттирип турар бис. Оон аңгыда «Кичээнгейлиг, уруглар!» акция уламчылавышаан. «Айыыл чок оруктар» акциязынче школавыстың шупту башкылары график езугаар үнүп турар» - деп, 6 «г» класстың башкызы Малина Солун-оол чугаалаан. Чаа өөредилге чылының эгелээни-биле, Тываның Баштыңы Владислав Ховалыг школачыларның айыыл чок чоруунче кичээнгейни углаан. Ол республиканың оруктарында дүвүренчиг байдалды айтып, оруктуң айыыл чок чоруун хандырарынче харыысалгалыг бүгү черлерни кыйгырган бижикти үндүргенин сагындыраал. Мира Конгул-оол.