Оюн «Чинчи чажырары»
Ойнакчылар ийи бөлүкке үстүп алыр. Чинчини баштай чажырар таланы кандыг-бир арга-биле тодарадыр. Чинчи чажырар эргени чаалап алган тала бодунуң бир төлээзин, чинчи чажырар кижини илередир. Ук кижи улустуң дөгерезиниң холунга чинчини тудускан хевирни көргүспүшаан, ойнакчыларның иштинден бир-ле кижиниң холунга чинчини чажырып каар. Ойнакчылар ийи холун чудуруктанып алгаш, көзүлдүр бурунгаар сунгулап алыр.
Чинчини тывар үеде, доктааттынган чурум езугаар, бир азы үш кижиниң холдарын ажыдар. Бир эвес ажыткан холдарның кайы-бирээзинден чинчини тып алган болза, өске тала чажырар, а тыппаан болза дараазында чажырарда, ол-ла кижи база катап тывар ужурлуг.
Чажырган чинчини үш катап тыппаан таланы «шиидер».
«Шииттирген» тала ырлаар, каргыраалап хөөмейлээр, чок болза каттырынчыг чүве чугаалааш, улус хөгледир, шүлүктээр, танцылаар, айтырыгларга харыылаар дээн ышкаш шииткелдерни күүседир. «Шииткелди» күүсеткен сөөлүнде, ол-ла талага чажырары-биле, чинчини бээр.
Тыва оюннар
Чурукту социал четкилерден алган
