«Россияның школачы чазы» бүгү Россия фестивалында тыва школачылар киржип четкен

Ставрополь хоорайга эртер «Россияның школачы чазы» III бүгү Россияның фестивалынга Кызыл база Улуг-Хем кожууннарның школачылары киржир. Тываның каттышкан командазы ук хоорайда чеде берген. Уругларның делегациязын Шагаан-Арыг хоорайның 2 дугаар школазының башкызы Сай-Даш Таскый база Сукпак школазының «Салгал» чогаадыкчы студияның удуртукчузу Чаяна Дилгижек удуртуп чоруур. Уруглар «Регионалдыг программа» тускай программага киржир болгаш, «Тыва - Ада-чурттуң камгалакчызы» деп Ада-чурттуң Улуг дайынының киржикчилери, 10 тыва эки турачы кыстар дугайында көргүзүгнү бараалгадыр. Көргүзүгде тыва эки турачы, күш-ажылдың хоочуну, маадыр ие, Кызыл Шөлге Тиилелге чыскаалының ийи удаа киржикчизи Вера Чульдумовна Байлактың овур-хевири кол черни ээлеп турар. «Бистиң көргүүзүвүс бедик хей-аът көдүүрлүүшкүннүг биче-буурай чоннуң дугайында, олар Ада-чурттуң Улуг дайынының чылдарында Тиилелгеге улуг үлүг-хуузун киирген» - деп, Чаяна Дилгижек чугаалаан. «Россияның школачы чазы» бүгү Россияның III Национал фестивалы апрель 22-26 хүннеринде Ставрополь хоорайга эртер. Аңаа чурттуң 80 субъектизинден 12-18 харлыг 1,5 муң школачылар чогаадыкчы мөөрейге киржир. Чуруктар Движение Первых | Тыва