Шагаа: тыва оюннарга республика чергелиг маргылдаа эрткен

Национал школа хөгжүдер институттуӊ этнопедагогиктиг шинчилелдер лабораториязыныӊ ажылдакчылары биле Өвүр кожууннуң Солчур ортумак школазының башкылары болгаш өөреникчилери «Тыва улустуӊ оюннары» деп республика чергелиг маргылдааны Кызылдыӊ 9 дугаар гимназиязында «Этнопедагогиктиг курлавыр төвүнге» эрттирген. Бо төлевилел 5 дугаар чыл уламчылап турар. Аңгы-аңгы кожууннардан 9 хире командалар дыка шыырак белеткелдиг, идепкейлиг киришкен. Бистиң школаның «Эзирлер» командазы хоорайның мурнундан киришкеш, ниити түңнел-биле 3-кү черге төлептиг болган. Школавыстың оолдары кончуг орлан- эрес, кашпагай, аваангыр чоруун дыка шыырак көргүскеннер. Кажык биле аьт чарыжы мөөрейге эң бичии киржикчилер 5 «а» класстан Чимит-Доржу Монгуш үшкү черни, Алдын-Очур Түлүш бирги черни бүзүрелдии-биле алганнар. Кажык адарынга Дамды Тойлук-оол ( 8 класс) бирги черни ээлээн. Тевек теверинге Тамерлан Хомушку ( 8 «в» класс) ийиги черни чаалап алган. Буга-шыдыраага Шойгу Кужугет база 7-ги класстың өөреникчизи ийиги черге төлептиг болганнар. 💬«Республика чергелиг тыва национал оюннарның маргылдаазын бедик деңнелге организастаарынга үлүг-хуузун киирген башкыларывыска: школаның директорунга, кижизидилге талазы-биле оралакчызынга, организатор башкыларга, тыва дыл, чогаал башкыларынга, немелде өөредилге төвүнүң башкыларынга, күш-культура башкыларынга, класс башкыларынга четтиргенивисти илереттивис. Өөреникчилер тыва улустуң оюннарын ойнап, эп-демниг онзагай хүннү эрттиргеннер» - деп, башкылар демдеглээн.