Шыдырааның тергииннери
Тыва чаштар шыдыраа маргылдаазында спорт мастериниң кандидаттарынче шилчип турар.
Кызыл хоорайның немелде өөредилге төвүнде шыдыраа клувунуң өөреникчилери улуг чедиишкинниг болганнар. Оларның аразында Мөңгүн Сарыг-Лама бо чылын спорт мастериниң бир дугаар разрядын алган. Шыдырааның тергииннери-биле «Сылдысчыгаш» солуннуң корреспондентизи ужуражып чугаалашкан.
- Кажан шыдыраа ойнап, сонуургап эгеледиң, Мөңгүн?
- Беш харлыг тургаш шыдыраа сонуургап эгелээн мен. Даайымдан шыдыраа дугайында айтырып, ону канчаар ойнаар деп айтырып-ла турдумда, ол мени өөреткен. Авам мээң улуг сонуургалым көргеш, шыдыраа клувунче киирген. Бөлгүмче барып тургаш, шору ойнап өөрени берген мен. Оон аңгы-аңгы маргылдааларга киржип эгеледим. Маргылдааларга тиилекчи болуп база турар мен.
- Бо оюннуң солун талазы чүл? Шыдыраа чүүге ажыктыгыл?
- Шыдыраа дээрге, бир-ле дугаарында, спорт болуп турар. Кижиниң угаан-медерелин экижидер. Меңээ шыдыраа черле солун ышкаш болган, ол оюннуң дүрзүлери дыка сонуургаткан. Кайнаар шыдырааны салыптар деп боданыр, угаан сайзырадыр.
- Шыдыраага спорт мастериниң кандидады апарган ышкажыл сен. Ол улуг чедиишкинге кайы хире өөрүдүң?
- Мен бир дугаар разряд алдым, дыка амырадым. Ам-даа мөөрейлерге белеткенир мен, Россия иштинге шыдыраага чемпион болур дээш кызыдар мен. Оон аңгыда командавыста өске эштеривис база кызып турарлар.
- Эң-не берге болган мөөрейни сактып көрем.
- Ийе, ындыг партиялар турган. Шыдыраада партиялар аңгы-аңгы: кыска база үр-даа бооп болур. Бир катап алды шак иштинде үргүлчүлээн оюн бар. Мен, шынап-ла, ол хире хөй шакты боданып, ойнапкан болдум. Ооң соонда беш шак ишти болган тур база бар. Ол оюннар дыка берге болган. Ынчалза-даа эки белеткенип алгаш, далаш чок боданып ойнаарга, солун апаар.
- Четтирдим, Мөңгүн!
Өлчей СЕРЕН
Чурук хууда архивтен
