Шын бодалга бүрүзү — бичии тиилелге
Реджина Манчык-Сат - Кызыл хоорайның 5 дугаар гимназиязының 2-ги классчызы. Ол сан, бойдус делегейи кичээлдеринге ынак, «Скифтер» танцы болгаш мода театрынче барып турар.
Чоокта чаа Москва хоорайдан Гран-при шаңналын эккелген. Чеже-даа бичии болза, аажок кызымаккай.
«Бистиң өг-бүлевис дыка эп-найыралдыг, эң бичиизи мен. Шупту меңээ ынак болгаш дузалажыр» — деп, ол өг-бүлезин таныштырган.
Бичии Реджина сан база бойдус делегейи эртемнерге сундулуг дээрзин сагындыраал. Сан кичээли аңаа хөглүг оюн-биле дөмей. Бир чаа бодалганы шын бодаптарга, бичии тиилелге болур. А бойдус делегейиниң кичээли аңаа кайгамчыктыг каас-чараш бойдус-чурумалды, дириг амытаннарны, сылдыстарны ажыдып берип турар.
💬«Бистиң делегейивистиң тургустунганын билип алыры дыка солун» - деп, Реджина чугаалаан.
А «Скифтер» танцы болгаш мода театрының дугайында Реджина күзелдии-биле таныштырган: — «Скифтер» - мээң эң-не улуг ынакшылым! Аңаа уран чүүлдүң аңгы-аңгы аргаларынга өөренип, ээлгир болурунга база чараш чүүлдерни билип ап турар мен. Сцена, хөгжүм, шимчээшкиннер – мээң бодумну илередир аргалар. Меңээ камера мурнунга бодун алдынары, подиумга бүзүрелдии-биле кылаштаары, аңгы-аңгы хептерни кедери дыка солун.
Чоокта чаа Москвага Аалчылар ордузунга «Бот-тускайлаң Россия» VI Бүгү-россияның шуулган-делгелгезинге киришкен бис. Аңаа «ЭТНОПОДИУМ» деп көргүзүгге бистиң театрывыс база киржип, тываны төлээлээн. Шуулганга «Эртинелер» биле «Жемчужная нежность» деп коллекцияларны көргүскен бис. «Эртинелер» «Мода, дизайн» номинацияга Гран-при шаңналын чаалап алган, а «Жемчужная нежность» «Этномода» номинацияга бирги черни ээлээн.
Мира КОНГУЛ-ООЛ очулдурган.
Өг-бүлениң чуруу
