Тензин Монгуш —шыдыраага тергиин ойнакчы

Шыдыраа – шупту назы-харның кижилеринге билдингир классиктиг оюн, ынчалза-даа бичии уруглар ортузунда ол кончуг нептереңгей. Ылаңгыя 5-7 харлыг уруглар шыдырааны кончуг сонуургаар. Бо үезинде чаштар шыдырааның кол-кол дүрүмнерин болгаш стратегиязын шиңгээдип аптар. Тензин Монгуш – Шагаан -Арыг хоорайда «Бодаган» уруглар садының доозукчузу, спорттуң интеллектуалдыг хевири – шыдыраа оюнунуң келир үедеги сылдызы. «Сылдысчыгаш» уруглар солунунуң корреспондентизи Тензинден кыска интервьюну алган. - Бодуңнуң дугайында чугаалап көрем. - Бирги класста өөренип турар мен. Меңээ сан кичээли солун. Санаарынга, бодалгалар бодаарынга, оон ыңай математиктиг кроссвордтар тыварынгасонуургалдыг мен. Хостуг үемде шыдыраа ойнаарынга ынак мен. - Шыдыраа маргылдааларынга кириштиң бе? - Кожуунга база республика чергелиг эрткен шыдыраа маргылдааларынга кириштим. Садикке болган турнирге ийиги черни ээледим. Кожуун маргылдаазынга бирги черни ээлээн мен, а республика чергелиг шыдыраа маргылдаазынга киришкеш, өөредилге сайыдының адындан өөрүп четтириишкин бижиин алдым. - Хостуг үеңде оон өске чүнү кылыр-дыр сен? - Амгы үеде бут бөмбүүн сонуургап тур мен. Школага бут бөмбүү биле шыдыраа бөлгүмнеринче баар бодалдыг мен. Оон ыңай лего чыырынга ынак мен. Робототехниканы база сонуургаар мен. Лего чыырынга кожууннуң чыынды командазы-биле мөөрейге киришкеш, аңаа бирги черни ээледим. - Тиилекчи болурга кандыг-дыр? - Маргылдааларга киржирге, дыка солун. Кажан тиилеп кааш, дыка өөрүүр мен. Авам-ачам база эштерим мени мактаарга, өөрүнчүг. - Садик барып тургаш, кандыг маргылдааларга киржип турдуң? - Садикке база маргылдааларга үргүлчү киржип турдум. Шыдыраа бөлгүмү биле менталдыг арифметикаже барып турдум. Оон ыңай «Шуптузун билип алыксап тур мен» эртем-шинчилел фестивалынга киришкен мен. - Өзүп келгеш кым болур сен? - Ачам ышкаш полицейжи болур мен. Ол хамык улусту камгалап турар. Мира КОНГУЛ-ООЛ очулдурган. Өг-бүлениң чуруктары