Тергиин өөреникчи

Тинмей Аиша 1 класстан тура Кызылдың 17 дугаар ортумак школазынче өөренип киргеш, амгы үеде 4-кү классты доозарының кырында келген. Аиша бүдүштүг, биче сеткилдиг болгаш чугаакыр уруг. Ол бир-ле солун чүүлдү тыпкан, ону клазында өөрлери-биле сайгарган турар, сонуургак чаңныг. Ол - класстың командири болгаш башкарыкчызы. Ол каҗан-даа чылда­гаан чок кичээл үспес, озалдавас. Быҗыг сагылга-чурумнуг болгаш тергиин эки өөреникчи. Ол школада-даа, оон дашкаар-даа болуп турар янзы-бүрү мөөрейлерниң идепкейлиг кирҗикчизи болгаш тиилекчизи — деп, клазының башкызы Римма Эрес -ооловна Шыырап өөреник­чи­зин улуг чоргаарал-биле адап, чугаалап турар. Чижээлээрге, 2023 чылда “Улустарның найыралы” фестивальга киришкеш, бирги черни, ТывКУ-нуң орус дыл мөөрейинге киришкеш, база бирги черни алган. “Традиционные накосные украшение” деп темага Москва хоорайның тускай чарлаан проектилер камгалалының мөөрейинге киржип, үшкү черни алган. Ол амгы үеде школада “Чогаалчы болуксаар мен” деп бөлгүмнүң эң идепкейҗизи. Ол шүлүктер болгаш чечен чугаалар биҗииринге ынак. Аишаның авазы Сай-Суу Чигир-ооловна — Водоканалда хынакчы, ачазы Аяс Борисович шериг албанныг, амгы үеде ТШО-га киржип чорааш, балыг­ланган, эмнедип турар. Аиша­ның бодундан улуг чаңгыс акызы 9 класстың өөреникчизи. Ада-ие уругларының өөредилге, киҗизидилгезинге улуг сонуургалдыг болгаш школа-биле быҗыг харылзааны тудуп турар. Аишаның шүлүүн номчукчуларга бараалгаттым. Мээң ынак чуртум — Тыва. Меңгилерлиг бедик дагларынга, Каас-чараш бойдузунга, Чоргаарланып ханмас-тыр мен. Арга-эзим тайгазында Аңы-меңи кайы көвей. Раиса Ондар, РФ-тиң улус өөредилгезиниң тергиини, ТР-ниң өөредилгезиниң алдарлыг болгаш улустуң башкызы.