Тоол КҮЗЕЛ

Кыштың аяс хүннериниң бирээзи турган. Дээрниң өңү чиңгир-ле көк. Хүннүң херелдеринден көдээ суурнуң хөй-хөй ыяш бажыңнарының делгем улуг соңгаларының кылагар шилдери чайыннанып тургулаан. «Малчын» кудумчузунуң бир талакы тротуары-биле Өлзеймаа иешкилер кылаштажып органнар. Бичии уруу Кара иезиниң холундан четтинмишаан, өрү шурап ойнап чораан. Таптыг-ла ынчан иешкилерниң кыры-биле «Як-40» деп самолёт элээн бедик ужуп эрткен. Кара ол самолеттан карак салбаан. Чиңгир-көк дээрниң талыгыр ырак делгемнеринде ужуп чораан ол эзирни кайгамчык-ла сонуургаан. — Самолёттуң соонга чүге шөйдүнчек ак ис артып каары ол, авай? – деп, уруу сонуургап айтырган. — Сээң идиктериң истери канчап харга артып каар ийик, ол база ындыг-дыр – деп, авазы далаш харыылаан. — Кайы хире бедик ужуп чоруурун биске көргүзери ол-дур, аа? Авазы чүнү-даа ыыттаваан. Оон Кара кандыг-ла-бир чүвени боданган хевирлиг болгаш база-ла айтырган: — Николаева-Терешкова ужудуп чорда, ракетазы изин база соонга арттырып каан бе? — Ийе, база арттырып каан. Караның төнмес хөй-ле айтырыы авазын анчыгзындырыпкан. Авазы уруунче көргеш: — Соксап көрем, Кара, сонуургавас-ла чүвези чок ийин, бо уругнуң – дээн. — Канчап сонуургавас боор, авай – деп, Кара иштинде шала хомудаксап, дидим эвес чугаалаан: — Мен өзүп келгеш, ол ракетаның изи-биле октаргайже аспайн ужуткай мен. — Күжүр космонавтыны — деп, авазы ам-на уруунуң бажын суйбааш, эргеледи аарак мынча дээн: — Ам сеңээ, Кара, чүгле кончуг эки өөредилге болгаш сагылга-чурум херек. Кара «Як-40» деп самолёттуң чиде берген изин дилегзинип, талыгырда чиңгир-көк дээрниң хиндиинче көрзүнмүшаан, боданып базып орган. Таспай Саая