Тываның бичии эртинези
«Тываның бичии эртинези» республика чергелиг бичии даңгыналар мөөрейи чыл санында салым-чаяанныг уругларны республиканың аңгы-аңгы булуңнарындан чыып турар. Бештен он харга чедир киржикчилер янзы-бүрү чадаларны эртер: национал хеп-биле көргүзүг, дефиле, авангард костюму, кежээки хеп база бодун таныштырары. Бо чылын Улусчу чогаадылга бажыңынга эрткен мөөрейге Кызыл хоорайның 15 дугаар лицейиниң ийиги классчызы Виолетта Кужугет база киришкен. «Сылдысчыгаш» солуннуң редакциязы подиумнарның келир үедеги сылдызы-биле интервьюну кылган.
- Бодуңнуң дугайында таныштырып көрем, школада ынак эртемнериң чүл?
- Орус дыл, номчулга база күш-культура кичээлдеринге ынак мен. Бо кичээлдер меңээ солун болгаш чиик, оон аңгыда күш-культура кичээлинде оюннарга киржири солун.
- Хостуг үеңде чүнү кылырынга ынак сен?
- Селгүүстээринге база ырлаарынга ынак мен. Оон аңгыда Tuvan Models модельдиг агентилелче ийи дугаар чыл барып турар мен, база бир сонуургалым болур.
- Мини-мисс мөөрейге киржирге, солун-дур бе?
- Ийе, дыка сонуургадым. Баштай модельдиг агентилелдиң иштинге «Жемчужинка Тувы» мини-мисстиң кастингизинге кириштим. Бүдүн өг-бүлевис-биле бир ай дургузунда белеткендивис. Эң-не берге чүүл – суг транспортунга хамаарышкан авангард көргүзүгнүң костюмун белеткээри болган. Бис викингилер кораблин кылып алдывыс. Мөөрей үезинде дыка сүрээдээшкин чок болган, ооң мурнунда база мөөрейлерге киржип турган мен. 2024 чылдың декабрь айда модельдиг агентилелдиң өөреникчилериниң аразынга мини-мисс мөөрейинге киришкеш, «Tuvan Models агентилелдиң мини-мизи» атты чаалап алган мен. «Тываның бичии эртинези» мөөрейге дүжүлге бөргү таварышпаза-даа, «Интеллект» база «Изящество» деп ийи аңгы номинацияга тиилекчи болдум.
- Моон соңгаар мөөрейлерге киржир сен бе? Өзүп келгеш кым болур күзелдиг сен?
- Чараш мөзү-шынарның мөөрейлеринге ам-даа киржир мен. Келир үеде, өзүп келгеш, модельдиг агентилелдиң директору болур күлелим бар.
- Өг-бүлеңни таныштырып көрем, эштериң кымнарыл?
- Мээң эштерим кайгамчык солун, дыка найыралдыг бис. Оларның-биле ойнаарынга, агаарлаарынга ынак мен. Авам, ачам кайызы-даа — эмчилер. Улуг угбам Дайана — 10-гу классчы.
- Чайгы дыштанылгада кандыг планнарың барыл?
- Чайгы дыштанылгам колдуунда өг-бүлем, эштерим-биле эртер. Оон аңгыда хемнер-хөлдерге эштип, ада-ием, угбам-биле аян-чорук кылыксаар мен.
«Виолетта аажок кызымаккай, угаанныг, күүседиичел кижи» — деп, уругнуң авазы Долаана Күжүгет таныштырган.
Мира КОНГУЛ-ООЛ очулдурган.
Өг-бүлениң архивинден чуруктар
