Тываның чаш Арзылаң мөгезиниң кежиин үлешкен найыр

Тыва Республиканың Наадым байырлалының 2022-2023 чылдарда 2 дакпыр тиилекчизи Арбай Саттын «Тыва Республиканың чаш Арзылаң мөгези» деп атты алганын байырлап, эш-өөрү, төрел-чону-биле кежиин үлешкен найыры болуп эрткен. Арбай Сат - Хөр-Тайга ортумак школазының 4-кү клазының өөреникчизи. Ол аныяк өг-бүлениң 2 дугаар оглу болуп төрүттүнген. Бичии мөгениң чедиишкиннерин демдеглеп, чаңгыс чер чурттуглары болгаш тыва хүрештиң бүгү бичии мөгейикчилери-биле кежиин үлешкен чараш найыр-байырлалды ада-иези, төрелдери организастап эрттирген. Сүт-Хөл кожууннуң удуртулгазы Чаш Арзылаңның чедиишкиннеринге өөрүп, мөгениң сүлдезин көдүрүп, Күчүтен атка чедир хүрежип, Тыва Республиканың төөгүзүнге балалбас исти арттырар Алдарлыг мөге болуп өзерин күзээш, чүгүрүк богбаны белек кылдыр сөңнээн. Кандыг-даа спортчунуң эң кол чөлеңгиижи тренер башкызы болур дээрзин демдеглээш, Арбайның тренер-башкызы, ачазы Амир Мөңгүн-оолович Сатка төлептиг оолду кижизидип өстүргенинге чоргаарланып, ооң Сүт-Хөл кожууннуң адын тудуп, хөй-хөй хүрештерге төлептиг черлерни ээлеп хүрежип чораанын барымдаалааш, «Кожууннуң Арзылаң мөгези» деп атты тывыскан. Чаш Арзылаңнын найырынга республиканың аңгы-аңгы булуңнарындан 250 хире чаш болгаш элээди мөгелер аалдап кээп, хүреш маргылдаазынга киришкен. Байырлалдың маргылдаазы 5 аңгы назы-хар аайы-биле чардынган бөлуүтерге болуп эрткенин сагындыраал. Чуруктарны социал четкилерден алган.