Улуг-Хемге бичии шыдыраачылар маргылдаазы эрткен

Шагаан-Арыгның "Бодаган" уруглар садынга 5-7 харлыг шыдыраачылар аразынга кожуун чергелиг шыдыраа маргылдаазы эрткенин Тываның Өөредилге яамызы дыңнаткан. Ниитизи-биле 12 бичии шыдыраачы боттарының шаа-биле угаан оюнунга киржип, удурланыкчыларынга дүжүп бербес дээш кызып ойнааннар. Бичии ойнакчыларның маргылдаазынга гимназияның башкызы Мерген Михайлович Тюлюш шииткекчи болган. Кожуун чергелиг шыдыраа маргылдаазынга Арыг-Үзүү суурнуң «Теремок», Шагаан-Арыгның «Солнышко», «Сказка», «Бодаган» уруглар садтарының бичии шыдыраачылары идепкейлиг киржип, шаңнал-макталды алган. Тываның өөредилге сайыдының хүлээлгезин күүседип турар Ренат Ооржактың эгелээшкини-биле боттанып турар «Шыдырааны уруглар садынче» төлевилели езугаар Улуг-Хем кожууннуң уруглар садтары моон-даа соңгаар маргылдааларны эрттирип, бичии шыдыраачыларны илередир.