Улуг Тиилелгениң 80 чылы: Арбитраж судунга ужуражылга

Тыва Республиканың Арбитраж судунуң дыңнадып турары-биле алырга, Улуг Тиилелгениң 80 чыл оюн таварыштыр «Өлүм чок полк. Сактып чор бис, чоргаарланып чор бис, хүндүлээр бис!» тураскаал стендизиниң чанынга патриотчу ажык чугааны кылганнар. КПКУ-нуң 8-ки клазының кадеттеринге тыва эки турачыларның, дайын хоочуннарының база тылдың күш-ажылчы кижилериниң дугайында таныштырган. Ужуражылга үезинде кадеттер тураскаал стендизинде шүүгү ажылдакчыларының төрел аймааның аразында тыва эки турачы өгбелериниң төөгүлүг материалдары, чуруктары, шаңналдары база допчу-намдары ажыглаттынганын билип алганнар. Оларның аразында Совет Эвилелиниң Маадыры Ч.Н. Хомушку, И.С. Чемизов, Г.Т. Доваадор дээш оон-даа өскелер бар. Төөгүлүг стенд шүүгү чериниң оран-савазында, Тиилелгениң Тугунуң хоолгазының чанында, кылдынган. Тиилелгениң Тугу – эрес-дидим чоруктуң болгаш фронтуга-даа, тылга-даа дайынга удур демисежип чорааннарны каттыштырган ыдык демдээ. Ол өгбелеривис дээш чоргааралды долдурган. Мира Конгул-оол белеткээн Чурукту социал четкилерден алган #80летпобеды