Уруглар садтарында чаштарны төрээн дылынга өөредип турар

Бо хүнде школа назыны четпээннерниң албан черлеринде 27 муң ажыг уруг хаара туттунган. Уруглар садтарында «Тыва дыл – уругларга», «Уруглар садтарында – хүреш» губернатор төлевилелдери боттанып турар. Шупту садтарда «Төрээн Тывам» деп өөредиглиг программаны киирген. Программа езугаар төрээн чугаа сайзырадырының кичээлдеринде 17349 уругну өөредип турар. Уругларның назы-харының аайы-биле кичээлдер неделяда 1-2 катап болур. Кижизидикчи башкылар кичээлдерде Национал школаларны хөгжүдериниң талазы-биле институттуң ажылдап кылганы өөредилге-методиктиг материалдарын, номчулга хрестоматияларын, ажылчын кыдырааштарны, өңнээр номчугаштарны ажыглап турарлар. Оон аңгыда тыва оюннарның, чаштарның төрээн дыл кырынга домак тургузуп өөрениринге таарымчалыг чуруктарның, ырыларның дузазы-биле кичээлдер тургустунган. 💬«Чижээлээрге, өөредиглиг пособие номунда кол маадырлар – Долаана биле Күдерек. Олар эштери-биле уругларны чүгле төрээн дылынга чугаалап өөредир эвес, а тыва чоннуң культуразын, чаңчылдарын база тыва чогаалдар-биле таныштырып турар» - деп, институттуң методизи Альбина Монгуш тайылбырлаан. Министерство образования Республики Тыва