«Эрткен чылын Чөөн-Хемчик кожуунга сургакчылаашкыным үезинде, бичии оолак меңээ келгеш, Чазак Бажыңын көөр күзелин илереткен. Ол Тываның Баштыңының ажылдап олурар кабинедин сонуургаан» — деп, Владислав Ховалыг ынчан бодунуң блогунга бижээн.
Элээн үе эрткенде, Бичии Доржунуң күзелин бүдүрери-биле, Чазак Бажыңынче чалаан. Ол аңаа Владислав Ховалыг-биле ужуражып, даргаларның ажылдап олурар оран-савазын көрген.
Бир чыл эрткенде, Тываның Баштыңы Чөөн-Хемчик кожуунга ажылчын үнүүшкүн аайы-биле чорааш, Хөндергейниң бичии чурттакчызы Доржу-биле катап база ужурашкан. Бо удаада Тываның Баштыңы Хөндергей суурда школаның капитал септелгезин хынап чораан.
«Доржу-биле кады суурнуң школазының капитал септелгезин хынап көрдүвүс. Оран-сава бүрүнү-биле чарттынган. Септелгени шынарлыг дужаар дээш подрядчик немей ажылдарны чорудуп турар. Ол эки-дир, школаның директору Аяна Сергеевна Сат коллективи-биле чаагайжыдылга ажылдарында хаара туттунган» — деп, Владислав Ховалыг дыңнаткан.
Бичии Доржу бо чылын 3 класска өөренир. Ол — эки өөредидилгелиг, активчи.
