«Сылдысчыгаштың» июнь айда үндүрүлгезинде шериг эмчи болур күзелдиг бичии кыс, Кызыл хоорайның 2 дугаар школазының өөреникчиз Аюуша Балдан-биле таныштырар-дыр бис, уруглар. Аюша корреспондентиниң айтырыгларынга харыылаан. Ол бодунуң өг-бүлезин болгаш сонуургалдарын таныштырган. Сонуургап номчуп көөр бис бе?
— Аюуша, чүнү кылырынга ынак сен?
— Чогаадыкчы чүүлдерге ынак мен, ол дээрге чуруттунар, пластилинден дүрзүлер кылыр, танцылаар, видеороликтер тырттырар, солун номнар номчуур. Номнардан дыка хөй чүүлдерни билип ап болур.
— Хостуг үеңде чүнү кылыр-дыр сен?
— Өг-бүлевис улуг, ынчангаш бажыңга чыглып келгеш дыштанырынга ынак бис. Солун оюннар ойнаар, солун-чугаалар чугаалажыр. Оон ыңай кино көөр, музей баарынга ынак бис. Библиотекадан солун номнар бижиттирип алыр.
— Аюуша, номчуттунарынга дыка ынак-тыр сен, а аян-чорукка ынак сен бе? Кайнаар дыштанып чоруксаар-дыр сен?
— Ийе, аян-чорукка база ынак мен. Бо чайын Ергакиге дыштаныр бис. «Спящая красавица» дугайында легенданы дыңнаксаар мен. Оон аңгыда Новосибирск, Самара хоорайларже, Моолче барган бис.
— Өг-бүлеңни таныштырып көрем.
— Мээң өг-бүлем улуг база найыралдыг. Ачамны Айдыс Борисович дээр. Ол – шериг кижи. Хөй шаңналдарлыг. Оон ыңай ачам – донор. Ол өске кижилерниң кадыкшылы дээш ханын дужаап турар. Мээң ачам – маадыр. Авамны Азияна Семис-ооловна дээр. Ол – башкы болгаш юрист. Амгы үеде химия, биология башкылап турар. Келир үениң эмчилерин база ветеринарларын белеткеп турар мен деп авам чугаалаар чорду. Менден улуг 3 акым бар. Олар – студентилер. Өске хоорайларда өөренип чоруур.
— Кандыг байырлалдарга ынак силер?
— Бистиң өг-бүлевис тыва езу-чаңчылдарны хүндүлээр база сагыыр. Тыва дылга ынак бис.
Эң-не ынак байырлалдарывыс – Шагаа, Наадым, Тыва дыл хүнү. Ёзу-чаңчылдарны сагыыр деп, авам, ачам биске үргүлчү чугаалап турар.
Шагаа байырлалын четтикпейн манаар бис. Аңаа белеткенир. Тыва хептеривисти кедер, тыва национал чемнерни кылыр. Оон тыва оюннарны база ойнаар. Хондур удувас дээш кызар бис.
— Аваңга дузалажыр-дыр сен бе?
— Ийе, авамның дузалакчызы мен. Аяк чуур, бажың ишти аайлаар, чамдыкта чем кылыр.
— Аюуша, өзүп келгеш кым болур сен?
— Дириг амытаннарга дыка ынак мен, олар бажың чок, муңгаргай карактарлыг болурга, дыка кээргенчиг. Ынчангаш дириг амытаннар эмнээр ветеринар болур күзелдиг мен. Ынчалза-даа шериг эмчи болур күзелим база бар.
— Буянныг чүректиг-дир сен, Аюуша. Сенден тергиин эмчи үнүп болур. А эң-не улуг күзелиң чүл?
— Авам, ачамга дыка ынак болгаш, олар кезээде өөрүшкүлүг, аас-кежиктиг болурун күзээр мен. Шупту авалар, ачалар кезээде кадык болзун!
Мира КОНГУЛ-ООЛ очулдурган
