«Сылдысчыгаш» солуннуң редакциязы Чөөн-Хемчик кожуунда Бажың-Алаак ортумак школазының 3-кү классчызы Чимиза Саая-биле чугаалашкан. Ол танцы бөлгүмүнче барып турар болгаш, янзы-бүрү мөөрейлерниң идепкейлиг киржикчизи.
— Чимиза, хостуг үеңде чүнү кылыр-дыр сен?
— Чуруттунар, чем кылыр, бажың ишти аайлаар, авамга дузалажыр мен. Оон ыңай кырган-авам-биле манчы кылыр бис. Ол үеде кады чугаалажыр, кырган-авам-биле кады турарга, дыка солун. Улус мени «кырган-авазынга дөмей» дээр. Чамдыкта мультиктер көөр, телефонга оюннар ойнаар мен. Эң-не ынак мультигим – «Маша биле Адыг».
— Келир үеде күзелдериң бар бе? Кымга дөмей болуксаар сен?
— Авам ышкаш эмчи болуксаар мен. Чамдыкта авамга аарыг улус кээр, авамның ажылдап турарын кыдыындан хайгаараар мен. Ол дүнелерде-даа, дыштаныр хүннерде-даа ажылдаар, чүге дизе аарыг улуска кайы-даа үеде дуза херек. Суурнуң чурттакчылары авамга четтиргенин илередир, мен база авам ышкаш болуксаар мен.
— Школада кандыг эртемге ынак сен? Хоббиң бар бе?
— Танцы бөлгүмүнче барып, школада болуп турар хемчеглерге киржип, аңаа танцылаар, ырлаар мен. Сценаже үнери меңээ солун. Эң-не ынак эртемим – сан кичээли, чүге дизе бо эртемни өөренири меңээ чиик, башкым үргүлчү эки демдектер салыр.
— Эштериң дугайында чугаалап көрем.
— Мээң эштерим аттарын Чимис база Чаяна дээр. Чаңгыс классста өөренип турар бис. Бажыңнарывысче база аалдажыр. Солун болгаш каттырынчыг видеолар, чуруктар тырттырарынга ынак бис. Үргүлчү кады турар болгаш, бот-боттарывысты дыка эки билир бис.
— Чайгы дыштанылга үезинде каяа четтиң?
— Бистиң өг-бүлевисте малчын аал бар, чайын колдуунда аңаа турар мен. Кат чыып, акыларым-биле хой кадарар бис. Оон ыңай авам-биле аржаанга дыштандывыс. Даглар үнерге, дыка эки. Арыг агаарлыг, чараш бойдустуг.
Чайгы дыштанылгам үезинде аалга кырган-авамга дузалажып, акыларым, угбаларым-биле ойнап, номнар номчуп, төрелдеривис-биле ужуражып турдувус. Оон ыңай Кызылда даай- авамның бажыңынга элээн дыштандым. Паркка агаарлап, тирге кара адарын сонуургадым.
— Акыларың, угбаларың хөй бе?
— Кады төрээн улуг акым бар, Чингис дээр, ол 12 харлыг. Ол — дыка улуг, сөөккүр. Адыгга дөмей, хүреш секциязы барып турар. Үргүлчү маргылдааларга киржир, ынчангаш бис, шупту, ону деткип, маргылдаалдарже баар бис. Ол доктаамал тиилээр, кызымак кижи. Оон өске кады төрээннер уруглары акыларым бар.
Бичии Чимизаны суурунда шупту билир: ол — кызымаккай, кижизиг, угаанныг уруг. Хөй оолдар аразында өзүп олурар болгаш, боду дээш туржурун билир, өскелерни база камгалаптар. Бичиизинден тура чүвеге өөрениичел, шупту төрелдери ооң «угаанныг карактарын» эскерип чугаалаарлар.
Мира КОНГУЛ-ООЛ очулдурган.
Айыран Сааяның хууда архивинден чуруктар
