Василиса Куулар Кызыл хоорайның 19 дугаар уруглар садынче барып турар. Ол – өг-бүлезинде хеймери, үш акылыг. Василиса интернационалчы өг-бүлеге төрүттүнген. Авазы – көрей, ачазы – тыва.
Чеже-даа бичии болза, Василиса чогаадыкчы амыдыралдыг. Ол «Эдегей» танцы болгаш костюм театрынче барып, харын-даа бүгү делегей чергелиг «Face of Asia» мөөрейниң онлайн-кастингизинге киржип четтикен. Оон аңгыда ол мини-школада өөренмишаан, «Sky» чурулга бөлгүмүнче барып турар.
– Василиса, амгы үеде кым болуксап тур сен? Келир үеде күзелдериңни чугаалап көрем.
– Амгы үеде улу болуксаар мен. «Рая биле сөөлгү улу» — эң-не ынак мультфильмим. Улу – эң-не чараш, күштүг амытан деп бодаар мен. Оон ыңай олар онзагай арга-шинектиг, ынчангаш улам кайгамчык болуп турар. Өзүп келгеш бодалдарымны чуруккаилередип база чараш хептерни көргүзүксээр мен.
– Хостуг үеңде чүнү кылырынга ынак сен?
– Мультфильмнер көөр, чуруттунар. Чурууру – мээң улуг сонуургалым. Хөй кезиинде ава-ачамны, акыларымны база диизивисти, ыдывысты чуруп турар мен. Оон ыңай фантастиктиг амытаннарны чогаадып алгаш, оларны чуруур: хөй кезиинде янзы-бүрү хевирлерлиг улулар болур.
– Василиса, чоокта чаа солун мөөрейге киришкениңни таныштырып көрем.
– «Face of Asia» бүгү делегей мөөрейиниң онлайн-шилилгезинге кириштим. Меңээ солун база дүвүренчиг болган. Мээң өг-бүлем база чоок улустарымның деткимчези улуг болган. Оларның бүзүрели – мээң тиилелгем. Видеоролик тырттырарынга база фотосессия кылырынга национал костюмнарны солуй кедип турганым уттундурбас. Тыва национал хепти, көрей ханбокту, узбек платьени кеттим.
Узбекистанга төрүттүнгеш, аңаа өскенин авам чугаалап берди. Бистиң ук-төөгүвүс – этниктиг көрейлер.
– Өг-бүлеңни таныштырып көрем.
– Үш улуг акым бар. Оларга дыка ынак мен. Улуг акымны Эрик дээр. Ол Красноярск хоорайда эмчи черинде өөренип турар. Ийи дугаар акым Владислав 15 дугаар лицейде өөренип турар. Баскетболду дыка сонуургаар. Республика чергелиг маргылдааларга үргүлчү киржип турар болгаш, шаңналдыг черлерни ээлеп турар. Үш дугаар акым Ярослав база 15 дугаар школада өөренип турар. Ол компьютер программаларын сонуургаар болгаш сайгарар. Авам – көрей, ачам – тыва. Мээң кырган- авам биле кырган-ачам Узбекистандан Тываже көжүп келирге, маңаа таныжып алганнар. Ынчангаш бистиң өг-бүлевисте ийи нацияның ёзу-чаңчылдары каттышкан.
– Бо кыжын өг-бүлеңерниң планы кандыгыл?
– Бистиң өг-бүлевистиң эң-не ынак байырлалы – Чаа чыл. Ооң соонда аян-чорук кылыр бис. Эрик акым өске хоорайда өөренип турар болганда, аңаа чедер бис.
«Сылдысчыгаш» уруглар солунунуң корреспондентизи бичии Василисаның авазы Елена Тян-биле база чугаалашкан.
«Василиса – ажык сеткилдиг, эвилең-ээлдек, чогаадыкчы кижи. Ооң онзагай талазы бар: шупту чүүлдерниң чүгле чараш талазын эскерип көөр. Ол эрге-чассыг-даа болза, аажок сагыш човангыр. Үргүлчү биске, ада-иезинге база акыларынга, ынакшылын илередир. Бажың ажылынга дузалажыр: орунун эдер, аяктарны-даа чуптар» — деп, Елена Тян чугаалаан.
Мира КОНГУЛ-ООЛ очулдурган.
Чуруктарны өг-бүле архивинден алган
