Виолетта Байыр бичиизинден тура ырлап, танцылаарынга ынак. Ол бир дугаар сценаже ийи харлыында үнген. Оон бээр уран чүүлге хандыкшылы улгаткан. Үш харлыында ава дугайында тыва ырларны ырлап, хөгжүм таварыштыр сагыш-сеткилди илередирин тергиин көргүскен.
Виолетта чеди харлыында кожууннуң «Хамнаарак» мөөрейинге Борбаана Баржайның «Эзир-Кара» деп ырын ырлаан. Аңаа ийиги чергениң дипломунга төлептиг болган. Ол ооң чогаадыкчы амыдыралынга чугула черни ээлээни чугаажок. Оон бээр-ле янзы-бүрү мөөрейлерге тиилеп, шаңналдарны чаалап ап эгелээн.
Кажан Виолетта ырлап тургаш, ёзулуг-ла аас-кежиктиг апаар. Ыры-хөгжүм ооң чуртталгазында чүгле сонуургал эвес, а долгандыр делегей-биле бодунуң сагыш-сеткилин илередир аргазы. Ол бодунуң арга-мергежилин бедидер дээш, доктаамал белеткенип, чаа-чаа ырларны дилеп турар.
Ырлаарындан аңгыда, Виолетта танцылаарынга ынак, ынчангаш бодунуң көргүзүглеринче танцыны киирип алырынга чаңчылчаан. Ада-иези ооң сонуургалдарын деткип, сценаже үнер аргаларны тып, дузалажып турар. Олар уруунуң салым-чаяанынга бүзүреп, берге үелерде кезээде чанында турарлар. Виолеттаның ада-иезиниң база уран чүүл-биле холбаалыын демдеглээри чугула. Ачазы – ыраажы, хөөмейжи. Авазы танцылап турган. Өг-бүлени ниити сонуургалдар демнештирип, чогаадыкчы тура-соруун көдүрүп турар.
Амгы үеде Виолетта Шуй ортумак школазында өөренип турар. Ол математика болгаш хөгжүм кичээлдеринге ынак. Математика логика болгаш янзы-бүрү бодалгалар бодаар арганы бээр, а хөгжүм ооң сагыш-сеткилин болгаш чогаадыкчы сорулгаларын илередиринге дузалаар. Ол школаның хөгжүмнүг хемчеглеринге идепкейлиг киришпишаан, бажыңында база ыры-хөгжүмге белеткенип турар. Ооң хүн бүрүзү кайгамчыктыг солун, чырык-чаагай эртип турар.
Виолетта хөгжүмчү болур күзелдиг. Математикада болгаш хөгжүмде салым-чаяанын сайзырадып турар.
Хостуг үезинде ол социал четкилерде хууда арнын сайзырадып турар. Бодунуң чогаадыкчы чоруун көрүкчүлерге бараалгадыр сорулгалыг. Ол билдингир артист болур күзелдиг, ооң кумири — Борбаана Баржай.
Мира КОНГУЛ-ООЛ очулдурган.
Чуруктар өг-бүлениң архивинден
