Ада-иениң уруглары-биле кижизидилге ажылы:
1. Уругларынга кандыг-даа маргышты чогуш-содаа-биле эвес, а эптиг-чөптүг чугаа-биле база шиитпирлеп ап болур деп чүүлдү тайылбырлаар.
2. Ада-ие серемчилелдиг болур болза эки! Оглу, уруу чүге орай удуп турарыл, чүге өөредилгези баксырап турарыл, чүге өөрениксевейн, школа барыксавайн турарыл, кым-биле эдержип турарыл, амгы үеде чүнү сонуургап турарыл дээн чүүлдү эскерип билип турары чугула.
3. Бис, ада-иелер, шупту ажыл-агыйлыг, мал-маганныг, кезээде чайывыс чок боор болгай бис. Ынчалза-даа бистиң уруувуска бо хүн, бо шакта бистиң сүмевис, бистиң дузавыс херек чадавас деп чүүлдү сактып чоруулуңар.
4. Ажы-төлүвүстүң сонуургалынга эптиг байдалды тургузуп, ооң сонуургалын сайзырадыылыңар.
5. Уругларыңар кайыын, кандыг медээлер ап турарын база хынап, билип алыры чугула. Телефонунда кандыг сайттарже кирип турарын болгаш телевизорда кандыг каналдарны даады-ла көөрүн эскерип көөр.
Ада-иениң эң-не кол шиитпирлээр ужурлуг айтырыы – ажы-төлүвүстү чараш мөзү-бүдүштүг, келир үеде бистиң чоргааралывыс болур кылдыр кижизидип алыры. Бо бүгүнү ажы-төлүвүске чугаалап, тайылбырлап тургаш уругну коргудуп, хорувайн, а оларның-биле оожум чугаалажып, сүмени кадып, өөредип кижизидери болур.
Ынчангаш бистиң ажы-төлүвүстен айыыл-халап чайлап-ла чорзун деп йөрээдивис!
Чурукту интернеттен алган.