Кызыл кожууннуң Сукпак суурунга байырлыг чыскаалдың болгаш ырының кожуун чергелиг мөөрейи школа назыны четпээн чаштар ортузунга эрткен. Хемчегни Улуг Тиилелгеге болгаш төрээн чуртун камгалаар дээш эрес-дидим чоруун көргүскен маадырларга тураскааткан.
Чаштар кызымаккай, бедик көдүрлүүшкүннүг мөөрейге белеткенген. Шүлүктерни шээжилеп, ырыларны өөренип, шериг чыскаалының дүрүмнерин катаптааннар. Уруглар чараш хептери-биле көрүкчүлер мурнунга боттарының салым-чаянын, билиглерин бараалгатканнар.
«Улуг Тиилелге хүнүн уткуштур эрткен хемчегге бичии чаштар-даа, ада-иелер-даа идепкейлиг киришкен. Ада-иелерге деткимчези дээш четтиргенивисти илереттивис. Уруглар дайынчының сагыш-сеткилин илереткен шериг ырыларны улуг хүндүткел-биле ырлашкан. Тиилелге хүнү дээрге онзагай хүн.Шупту өгбелеривистиң маадырлыг чоруун сактып, тайбыңны болгаш хосталганы кадагалаарын даңгыраглаар бис. Маадырлар бистиң чүректеривиске кезээ мөңгеде артар, оларның эрес-дидим чоруу кажан-даа уттундурбас» — деп, организаторлар демдеглээн.
Мөөрейниң түңнели-биле алырга, Сукпак суурнуң «Петушок» уруглар сады бирги черни ээлээн. Ийиги черде Черби суурдан уруглар садының командазы, үшкү черде Ээрбектиң «Хензигбей» уруглар сады база Элегест-Аксының «Салгал» уруглар садының командалары болган.
Мөөрейге ниитизи-биле 11 уруглар садтарындан 12 команда киришкенин сагындыраал.
Тываның Өөредилге яамызының медээзи.
