Кызылдың Михаил Бухтуев аттыг 1 дугаар школазының 1 «Б» клазының өөреникчилери бөгүн клазының башкызы Айлан Додеевна Ооржакка Башкылар хүнүн таварыштыр байыр чедирген.
Биргиклассчы чаштарның эң-не бир дугаар, эң-не баштайгы башкызынга байыр чедириишкини уттундурбас болгаш солун болган дээрзи чугаажок.
Тоолчургу аян-чорукту, эки номчуурун, чараш бижиирин, машина садып алырын, хөглүг болурун, кадыкшылды дээш оон-даа хөй улуг улуска дөмейлешпес, чаптанчыг күзелдерни чечек сунган уруг бүрүзү илереткен. Хемчег уругларның боттарынга-даа, башкыга-даа, ада-иелерге-даа өөрүшкүнү сөңнээн дээрзи чугаажок.
Кандыг-даа кижиге баштайгы башкызы эргим. Байырлалыңар-биле, башкылар!
