Тываның кадеттер корпузунуң 3-тен 6 класстарыныӊ болгаш Кызылдың 2 дугаар школазының өөреникчилеринге келген аалчылар «Сылдысчыгаштыӊ» канчаар тургустунуп, кымнар ажылдап турганын тодазы-биле тайылбырлап, ооң төөгүзүн сонуургатканнар.
Хоочун журналистерниң ажылдап келген үезинде таварышкан солун сактыышкыннарын уруглар улуг сонуургал-биле дыӊнап, айтырыгларны салганнар.
Тензин-Лхамо Санчай, Кызыл хоорайның 2 дугаар школазының 7 «б» клазының өөреникчизи: — Мен сөөлгү чылдарда библиотекаже доктаамал кээп, орус-даа, тыва-даа дылдарда номнарны улуг сонуургал-биле номчуп тур мен. Бо удаада «Сылдысчыгаш» солуннуң 80 харлаанга тураскааткан юбилейлиг ужуражылганы сонуургап келдим. «Сылдысчыгаш» солун тургустунганындан бээр 80 чыл чеде берген деп чаа билип алдым. Солунну моон соңгаар ам-даа номчуур мен.
Данияр Санчай, Кызыл хоорайның 2 дугаар школазының 7 «б» клазының өөреникчизи: — Мен база уруглар библиотеказының доктаамал номчукчузу мен. Мында кандыг-даа номнар бар. «Сылдысчыгаш» солуннуң 80 харлаан юбилейинге тураскааткан ужуражылгадан солун чүүлдерни билип алдым.
Интернет четкизи чеже-даа сайзырап турар болза, «Сылдысчыгаш» уруглар солунун черле чырыкче үндүрер болза эки деп бодаар мен. Чүге дизе школачыларга таарышкан темаларлыг солун-сеткүүлдерни камгалап арттырып алыры чугула. Бис оон 80 чыл бурунгаар чаштарның амыдырал-чуртталгазын, ынчан чүнү кылып турганын көрүп ап болур аргалыг бис.
А келир үеде база 80 чыл эртерге, ынчангы салгалдар «Сылдысчыгаш» солуннуң арыннарындан бо үени көрүп ап болур-дур.
Ольга ХИИГЕТ.
К.Чуковский аттыг уруглар ном саӊыныӊ библиотекары.
Чуруктарны Мира КОНГУЛ-ООЛ тырттырган
