«Чаш угаакчылар» интеллектуалдыг олимпиада Кызыл хоорайның 27 дугаар Угулза аттыг уруглар садынга болуп эрткен. Аңаа хоорайның 9, 18, 22, 27, 35 база 37 дугаар уруглар садтарының чаштары киришкен. Уругларга ук хемчег езулуг-ла угаан-бодал сайзыралының болгаш сагынгыр чоруктуң байырлалы болган. Чаштар болгаш оларның дагдыныкчылары олимпиада дээрге чүгле спорт, күш-шыдал, шыдамыккай чорук эвес, а быжыг билиг, логика, тывынгыры деп бадыткаан.
Залды маргылдааның байырланчыг хөөнү хөме алган, уруглар боттарының билиглерин күзелдии-биле бараалгадып турган. Чаштар янзы-бүрү шенелделерни эрткен, ынчалза-даа сагынгыр-тывынгыры-биле чүнү-даа шиитпирлеп болурун көргүскеннер.
Чидиг маргылдааларның түңнелинде, эң-не шыырак командалар тиилеп үнген. Бирги чергениң дипломун 35 дугаар уруглар садының командазы чаалап алган. Ийиги чергениң дипломунга 37 дугаар садтың чаштары төлептиг болганнар, а үшкү черни 18 дугаар уруглар садының командазы ээлээн.
«Эң-не идепкейлиглер» тускай номинацияга 9 дугаар уруглар сады, «Эң-не быжыг билиглиг» номинацияга 22 дугаар уруглар сады, «Логиканы тергиин эки билири» деп номинацияга 27 дугаар уруглар садының командалары төлептиг болган.
«Олимпиаданың бичии киржикчилеринге байыр чедирип тур бис. Республиканың өске-даа уруглар садтары шак мындыг хемчегни организастаарын күзедивис. Интеллектуалдыг олимпиада – чаштарның угаан-бодалын сайзырадыр тергиин арга. «Чаш угаакчылар» шимчээшкинге каттыжыңар» — деп, организакчылар кыйгырган.
Министерство образования Республики Тыва
