Чаштарның күзелдерин бижээн баштайгы үш шарны «Күзелдер шивизинден» Тываның Баштыңы Владислав Ховалыг адыргаш, республиканың девискээринге бүгү Россияның акциязын ажыткан. Бо үеге чедир 319 чагааны республиканың уруглары акцияның сайтызынче бижээн.
Владислав Ховалыг беш харлыг Давааның база тос харлыг Элионораның күзелдерин күүседир, а Шагаан-Арыг хоорайдан чеди харлыг Тензинниң күзели – Кызылдың «ДримТим» командазы-биле ужуражыры.
«Акцияга идепкейлиг киржиңер. Шупту кады Чаа чылдың хуулгаазынныг байырланчыг хөөнүн тургузар бис» — деп, Тываның Баштыңы бодунуң блогунда демдеглээн.
Чыл санында уругларның күзелдерин чазактың кежигүннери, яамыларның болгаш өске-даа ведомстволарның удуртукчулары боттандырып турар. Ол ышкаш Соок-Ирейниң ролюнда чаңчыл езугаар сайгарлыкчылар болгаш хөй-ниити ажылдакчылары киржип турарлар.
