Дөрт харлыг Давид Кызылдың 21 дугаар уруглар садынче өөрүшкү-биле барып турар. Ол башкыларынга болгаш бөлүкте кады хүнзеп турар эштеринге дыка ынак. Ол бешке чедир илдик чокка санап, ооң иштинде саннарны кадып-казып өөренип алган. Давид танцылаарынга, ырлаарынга, шүлүктээринге сонуургалдыг. Шимчээшкиннер көргүзүп тургаш, ырыны күүседири аңаа эң-не хөглүг, солун. Ол тыва хүреш болгаш каратэ секциязынче база барып эгелээн.
Бичии Давидашканың келир үеде кым болур дугайында күзелдери хүн бүрүде өскерлип, бирде эмчи, бирде солдат, бирде-бирде «Человек паук»-даа болуксаар.
Ол авазынга дузалажып, чем кылыксаар. Чуурганы үске хаарып, бутербродту кылып өөренип алганы — Давидтиң кулинария талазы-биле эң-не баштайгы чедиишкиннери. Чем кылырындан аңгыда, аяк-сава чууру аңаа кончуг солун. Бодунуң чемненген аяк-таваан өөрүшкү-биле чуп кааптар чаңчылдыг.
Давид тывызыктар чогаадырынга кончуг ынак. Чижээлээрге, «Эң-не узун, эң-не угаанныг болгаш хөгжүмчү кижи кымыл?» деп, ол даайы Марктың дугайында тывызыкты чогааткан.
Чылдың дөрт эргилдезиниң шуптузунга дең ынак. Алдын күстүң дүжүп, бүрүлерниң саргарып эгелээни — Давидке эң-не өөрүнчүг болуушкун. Ол дыштаныр хонуктарда күскү сесерликке агаарлаарынга дыка ынак.
Уруглар садынга удавас болур «Алдын күс» делгелгезинге киржир дээш, Давид белеткенип турар. Күстүң соонда кыш дүжер деп, Давид ыяк доктаадып алган. Чүге дээрге хар чааптарга, ооң чыл дургузунда манааны төрүттүнген хүнү. Ынчангаш күстү четтикпейн манаар чаңчылдыг.
Бичии Давид эң-не баштайгы юбилейинде эш-өөрүн, акыларын, угбаларын болгаш өске-даа төрелдерин чалап алгаш, байырлаарын планнап турар.
Фото: Буян ООРЖАК