Сосновка ортумак школазының өөреникчилери Армейжи культура хүннеринде «Читай, Тыва!» бирги регионнар аразының ном фестиваль-ярмарказынга киришкен. Төлевилелдиң кол сорулгазы — уруглар ортузунга номчулганы болгаш номнарны нептередири, оон аңгыда төрээн черинге ынакшылды, ооң төөгүзү болгаш культуразынга сонуургалды оттуруп, литературлуг номчулга амыдыралынче республиканың чонун хаара тудары. Ол ышкаш аныяк-өскенге ном парлалгазын таныштырып, оларның номчулгаже сонуургалын системниг хевирлээри чугула черни ээлээри чугаажок.
Фестиваль-ярмаркага Россияның Камгалал яамызының төп шериг-далай библиотеказының төлээлери киришкен. Библиотеканың директору Елена Смирнова база килдис эргелекчизи Наталья Рыжикова уругларга солун таныштырылганы чоруткан. Шериг-далай библиотеказы «ПоZыVной – Победа!». деп номнар делгелгезин организастаан.
Алена Нан-Хоо белеткээн.
