Республиканың өөредилге черлеринге бир неделя дургузунда «Блокада хлеви» акция үргүлчүлээн. Кичээлдер уругларның чуртунга ынак болурунга, ленинградчыларның маадырлыг чоруун билип алырынга болгаш патриотчу кижизидилгени алырынга ажыктыг болган. Январь 27-ниң хүнүнде ленинградчылар блокададан долузу-биле хосталган.
Кызылдың 9 дугаар гимназиязынга «Блокада хлеви – чуртталганың болгаш идегелдиң демдээ» деп кичээлдер болган. Ук кичээлдерни школаның кадет клазының өөреникчилери өске класстарга эрттиргени өөредиглиг. Аңаа уруглар Ленинград хоорайның 872 хонукту маадырлыы-биле чурттап эрткенин болгаш чүс муң блокадчыларның аштап, түреп өлгенин кээргел-биле дыңнааннар.
Мугур-Аксының «Хамнаарак» уруглар садының белеткел бөлүү «Блокада Ленинградының хлеви» деп презентацияны көрүп, 125 грамм хлебти амзааннар.
Эрзин кожууннуң Бай-Даг школазының даштынга, чаңгыс чер-чурттугларынга блокада хлевин үлээн.
Ийниң школачылары «Блокада үезинде Ленинградтың чаштары» деп документалдыг фильмни көргеннер.
Чеди-Хөл кожуун ном саңынга «Маадырлыг 900 хонук» деп квест-оюнну уругларга ойнаткан.
#Блокатныйхлеб #акция #Ленинград #Сылдысчыгаш_Солун