Мээң адымны Болат-оол Аганак дээр. Чадаананың 1 дугаар школазында 3 «б» класста өөренип турар мен. Авам, ачамның улуг оглу мен. Бодумдан бичии ийи оол, ийи кыс дөрт дуңмам бар. Кыстар 1 биле 2 дугаар класстың өөреникчилери, а оолдар иелээн уруглар сады барып турар.
Кырган-авам биле кырган-ачам бар. Олар меңээ аажок ынак. Хостуг үемде агаарлаарынга кончуг ынак мен. Кырган-авам биле кырган- ачам мени эң-не чараш черлерге чедирип, солун болгаш онзагай төөгүлүг черлерни чугаалап бээр улус. Ынчангаш бойдустуң ала-чайгаар бүткен чаражын эң-не сонуургаар мен. Төрээн черимге, Тывамга дыка ынак мен.
Көңгүс бичиимде, уруглар сады барып турумда, кырган-ачам меңээ тыва хүрешке сонуургалды оттурган. Школага өөренип эгелээш-ле, хүреш секциязынче барып эгеледим. Аңгы-аңгы байырлалдарда каяа-даа болган хүреш маргылдааларынга кырган-авам биле кырган-ачам мени чедирип, киириштирип чоруп турда, мээң хүрешке сонуургалым улам оттуп келген. Улуг мөгелер хүрежин база меңээ албан-биле көргүзер улус. Улуг мөгелерниң хүрежин сонуургал-биле көрүп эгелээш, мөге ат чедип алыксаар апарган мен. 2023 чылдың Наадым байырлалынга бичии оолдар аразынга болган тыва хүреш маргылдаазынга бодумнуң үе-чергелеримниң аразынга 128 мөгеден 3 дугаар черге чедир хүрешкеш, ТР-ниң «Чаш Начын мөгези» деп атты күүседипкен мен. Күзелим бүткен. Бо ат меңээ эң-не хүндүлүг ат-тыр. Ону чедип алырынга хөй күштү үндүрүп, ада-иемниң, тренер башкыларымның чугаазын дыңнап, сүмезин күүседип чораанымга чоргаарланыр-дыр мен.
«Мөге кижи биче сеткилдиг, арыг-силиг, хүндүлээчел болур, оглум»– деп кырган ада-ием меңээ чагып чоруур. Ол дег бодумнуң үе-черге эш-өөрүмге эки, кызымаккай өөренирин, спортка ынак, биче сеткилдиг болурун, арыг агаарга хөй дыштанырын күзээр-дир мен.
Аганак БОЛАТ-ООЛ.
