Тыва Республиканың улустуң хөөмейжилери Игорь Көшкендей, Евгений Сарыглар, Аян-оол Сам, Бады-Доржу Ондар, ТР-ниң алдарлыг артистери Аян Ширижик, Айдысмаа Көшкендей, хөөмейжи база башкы Эртине Тумат, барабанчы Байлак Моңгуш, флейта ойнакчызы Алдынай Араптан болгаш «Чиргилчин», «Алаш», «Эзеңги», «Чаңгы-Хая» ансамбльдериниң солистери дээш үстүнде ады кирген чонга билдингир салым-чаяанныг артистер шупту Тываның Ростислав Кенденбиль аттыг уран чүүл школазының доозукчулары болгай.
Уругларның Р. Кенденбиль аттыг уран чүүл школазы тургустунгандан бээр 45 чыл оюн демдеглээн. 2023 юбилейлиг чылда школаның 197 талантылыг өөреникчилери, башкылары ниитизи-биле 18 Россия чергелиг чогаадыкчы мөөрейлерге, делгелгелерге киришкеш, шаңналдыг черлерни алган.
Мөөрейлерге шаңналдыг черлер алганнарның аразынче 6-гы классчы Ангелина Кулундарий база кирип турар. Мөөрейлерге чаңгыс эвес удаа шаңналдыг черлер ап чорууру ооң алызындан салым-чаяанныының бадыткалы-дыр.
Уран чүүлге салым-чаяанныг кызының дугайында авазындан айтырдым.
«Чажында кылаштавайн тургаш-ла, ыры-хөгжүмге дыка ынак кижи. Телевизорга үргүлчү ыры-хөгжүмнүг каналдар көөр болган. Уруглар сады барып тургаш, хөйнүң ырын күүседир хорга ырлап эгелээн. Башкылары дыка мактаар чүве. Февральда 6 харлаптарга, чайын алды хар чартык турда, черле шенеп көөр-дүр дээш, республиканың уран чүүл школазынче кирериниң шылгалдаларын дужааткан бис. Шылгалда бүрүзүн «5» деп демдекке дужаап алгаш, кандыг-даа бергедээшкини чокка Тываның Р. Кенденбиль аттыг уран чүүл школазынче кире берген. Шылгалда хүлээп турган баян биле фортепиано башкылары уруувусту хунаажып эгелээн чүве. Уран талантызын хынаан соонда, ниити билиин эге класс башкызы шылгаар чорду» – деп, Ангелинаның авазы Валерия Кулундарий хеймер кызының дугайында чугаалады.
Ынчан Ангелина фортепианону шилип алган. Ам алды дугаар чыл өөренип турары бо. Фортепиано башкызы Анай-Хаак Балбан-оол.
Ангелина Кулундарий 2023 чылдың декабрьда Кемерово хоорайның күрүнениң культура институдунга С.В. Рахманиновтуң төрүттүнгенден бээр 150 чыл оюнга тураскааткан «Сибириада» XII делегей чергелиг бичии уруглар аразынга болган мөөрейге киришкеш, «Хөгжүм күүселдези: академиктиг фортепиано (чаңгыстың күүселдези)» деп номинацияга II чергениң лауреады болган.
«Сибириада» – РФ-тиң 2015 чылдың ноябрь 17-де бадылааны «Шылгараңгай салым-чаяанын илередип, ону сайзыраткаш, түңнелдерни көргүскен уругларны тодарадыры» деп доктаалынга үндезилеп РФ-тиң Чырыдыышкын яамызының тургусканы мөөрейлерниң даңзызынче кирген мөөрей. «Сибириада» XII Делегей чергелиг мөөрейниң тиилекчилери күрүнениң чаңгыс аай шылгалдазын дужаагаш, дээди өөредилге черинче дужаап киреринге немелде баллдар бээр болгаш дээди өөредилге черинге өөренип тургаш грант алыр эргени алыр мөөрей.
Ангелина Кулундарий 8 аңгы номинациялыг, 3500 киржикчилиг мөөрейге киришкеш, ол хире бедик шаңналды алган. Ол бо чылын ыры-хөгжүмден аңгыда, Россия чергелиг олимпиаданың школага болган чадазынга эки үре-түңнелдерни көргүскен. Оон алгаш көөрге, ол чүгле ыры-хөгжүмге эвес, а өөредилге болгаш эртем-билиг талазы-биле база чедиишкиннерлиг кижи.
Айдың ОНДАР
Чуруктарны маадырның архивинден алган
