Хол-тевек — тевек оюнунуң бир хевири. Хол, бут-биле борбаанайны октап, теп ойнаар оюн. Борбаанайны шаанда инек таагызындан кылып алыр турган. Ам ону бичии мячик солуп болур.
Хол-тевек шимченгир оюннарга хамааржыр. Ону ойнаарга, кижиниң шыңган эъттериниң сайзыралынга, кичээнгейлиг болурунга, шимчээшкиннерни шын кылырынга, дурт-сынның дорт хевирлеттинеринге ажык- дузалыг. Хол- тевекке эки мергежиир дизе, доктаамал ойнаары негеттинер. Кижиниң организминге улуг күжениишкин болдурбайн турар.
Хол-тевекке маргылдаалажып ойнаарда, оюннуң дөрт эге аргазын күүседир ужурлуг: биргизи — «челбиш», ийигизи — «сирлеш», үшкүзү — «чүктеш», дөрткүзү — «шавыш».
1-ги арга: «Челбиш» — холдар дорт, оңдан солагай холче дамчыдып кылып эгелээш, 20 катап «челбип» күүседир;
2-ги арга: «Сирлеш» — оңнап, солагайлап, 5-5 катап күүседир;
3-кү арга: «Чүктеш» — база-ла 5-5 катап күүседир;
4-кү арга: «Шавыш» — оң холдап октааш, солагайлап тудар, оон солагай холдуң октаанын оң хол-биле тудар. 10-ну күүседир.
Чуруктарны болгаш сөзүглелди ажык
четкилерден алган.
