Кандыг-даа кижи школачы чылдарында эки өөренип, бажың ажылдарынга, авазынга үргүлчү дузалажыр ужурлуг.
Бичии дуңмаларывысты азыражып, аъш-чем кылып өөренип алгаш, хостуг үелеривисте чаагай салаттар кылып, пирожноелер быжырып алгаш, чагыг-биле садып турдувус. Ававыстың бичии садыынга ажылдап, үүрмек барааннар, суй белектер, каасталгалар садып өөренип алган бис.
Сески класска Москваны бир неделя дургузунда көрүп, кезип чордувус. Тоску классты эки өөренип доозарывыска, акывыс Очур 11-ги классты багай эвес өөренгени дээш ада-иевис Анталья, Турцияже экскурсиялаткан.
Эрткен чайын даштыкы чуртту, өске нация чоннарны, далайны, пароходтарны көрүп таныштывыс. Англи дылды кызып өөренип турганывыс ажыктыг болган. Орукка, садыгларга даштыкы дылга саат чокка чугаалажып, ававыс Саглай Станиславовнага хала чокка очулдуруп берип турдувус. Ававыс ол дээш дыка өөрээн.
Санкт-Петербургтан Антальяже ужуп кээривиске, дыка чараш порт хоорай болган. Курортта дыштанган улус кымыскаяк дег хөй. Далайның эриинге селгүүстеп, корабль, пароходтарны сонуургап, эштип дыштанырга, онза-ла болган.
Дөрт дугаар хонуувуста Стамбулче ужуптувус. Ында колдуу боттарының дылынга чугаалажыр. Идик-хеви, бажыңнары каас-чараш. Аъш-чемин кудумчуларда базым бүрүзүнде садып турар. Турцияның эрги кудумчулары дыка тар, чүгле чадаг кылаштаар. Улуг улуска берге, оңгул-чиңгил оруктарлыг. Бойдузу кайгамчык чараш.
Школаны дооскаш, кандыг-бир өөредилге черинче кирип алыр дизе, амдыгааштан өске хоорайларны кезип, даштыкы чурттар-биле таныжып, аян-чорук кылыры ажыктыг-дыр деп түңнедивис.
Очур СЕРЕНОТ
Ай-Суу МАЛБЫК-ООЛ
Алина МОНГУШ
