Экии, ынак солунум «Сылдысчыгаш!»
Мени Анастасия Ооржак дээр. Чеди харлыг мен. Сукпак школазының 2 “г” клазында өөренип турар мен. Клазым башкызы — Сай-Суу Багай-ооловна Тюлюш. Хостуг үемде уран чүүл школазында танцы бөлгүмүнче барып турар мен. Башкымны Алла Анатольевна дээр.
Өг-бүлемде 6 кижи бар бис: ачам, авам, 3 кыс дуңмам, мен улуг уруу мен.
Бо айда школавыска кадыкшыл хүнү чарлаттынган. Аңаа чадаг чарыш маргылдаазынга уруглар аразынга 5 дугаар халып келдим.
Класстан дашкаар кичээлдер база болур. “Хөглүг математика”, “Улусчу ужурлар”, “Тыва дылым”, “Номнуң өңнүктери” деп солун бөлгүмнерже барып турар мен.
Башкылар байырлалында ынак башкымга чараш открытка кылып бердим. Башкым аңаа дендии өөрүдү.
Школавыста үргүлчү солун мөөрейлер болуп-ла турар. Октябрь 20-де школа иштинге болур “Тоолдуң чечени торгу дег чараш” мөөрейге кириштим. Чылдың-на школада болуп турар “100 тергиин өөреникчи” мөөрейге 2022 — 2023 өөредилге чылында киришкеш, чаңгыс классчым Амиран Биче-оол-биле тиилекчилер болдувус. Аңгы-аңгы школаларда өөренип турар эштеримге эки өөренирин күзедим.
Анастасия Ооржак,
Сукпак школазының 2 “г” клазының өөреникчизи
